గోరుచిక్కుడు!

గోరుచిక్కుడు లేక కాయలను కూరగాయగా వాడుతారు. తీవ్ర కరువు పరిస్థితులను అధిక వేడిని తట్టుకొనగలుగుతుంది.

ఉపయోగాలు : లేత కాయలను కూరగాయగా వాడుతారు.కొన్ని రకాల గోరుచిక్కుడు గింజల నుంచి జిగురు తయారు చేసి ఈ జిగురును బట్టలు, పేపరు, నూనె, సౌందర్య సాధనాల పరిశ్రమలలో వాడుతారు. బాగా కొమ్మలు పెరిగే గోరుచిక్కుడు రకాలను పచ్చిమేతగాను, గింజలను పశువుల దాణాగాను వాడుతారు. ఈ పంటను పచ్చిరొట్ట ఎరువుగా మరియు ఔషధ తయారీలోను వాడుతారు.

వాతావరణం: ఉష్ణమండల పంట. మంచును తట్టుకోలేదు. తక్కువ వర్షపాతం. అధిక ఉష్ణోగ్రత ప్రాంతాల్లో కూడా బాగా పెరుగుతుంది.

నేలలు : మురుగు నీరు పోయే సౌకర్యం గల సారవంతమైన ఎర్రగరప నేలలు, ఒండ్రు నేలలు అనుకూలం. అధిక సాంద్రత గల బరువైన నేలలు పనికిరావు. ఉదజని సూచిక 7.5-8.0 మధ్య గల నేలలు అనుకూలం.

రకాలు:
పూసా మౌసమి : ఖరీప్‌ పంటకు అనువైనది. గింజ విత్తిన 70-80 రోజులకు మొదటి కోతకు వస్తుంది. కాయలు 10-12 సెం.మీ. పొడవు ఉంటాయి. మొక్క కొమ్మలతో ఉంటుంది.

పూసాసదాబహార్‌ : ఖరీఫ్‌, వేసవి పంటలకు అనువైనది. గింజ విత్తిన 45-50 రోజులకే మొదటి కోతకు వస్తుంది. కాయలు 12-13 సెం.మీ. పొడవు ఉంటాయి. మొక్క కొమ్మలతో ఉంటుంది.

పూసానవబహార్‌(పూసా మౌసమిపూసా సదాబహార్‌): దీని కాయలు పూసా మౌసమిలా ఉంటాయి. మొక్క కొమ్మలు లేకుండా ఉంటుంది. ఖరీఫ్‌, వేసవి పంటలకు అనువైన రకం.

ప్రైవేట్‌ రకాలు (గౌరి) : ఖరీఫ్‌, వేసవి పంటలకు అనువైనది
విత్తే సమయం : 
ఖరీఫ్‌ : జూన్‌ నుండి జూలై వరకు

వేసవి : జనవరి రెండవ పక్షం నుండి – ఫిబ్రవరి చివరి వరకు

విత్తన మోతాదు : ఎకరాకు 12-16 కిలోలు

విత్తనశుద్ధి : విత్తేముందు కిలో విత్తనానికి 5గ్రా. ఇమిడాక్లోప్రిడ్‌ మరియు 4గ్రా. ట్రైకోడెర్మ విరిడి కలిపి విత్తనశుద్ధి చేయాలి.

నేల తయారీ మరియు విత్తటం : నేలను అదును వచ్చే వరకు 4-5 సార్లు బాగా దున్నాలి. మొదటిసారి గోరుచిక్కుడు విత్తేటట్లయితే రైజోబియం కల్చర్‌ విత్తనానికి పట్టించి విత్తుకోవాలి. వర్షాకాలంలో 60 సెం.మీ. దూరంలో కాలువలు, బోదెలు చేసుకోవాలి. వేసవిలో చిన్న మళ్ళుగా చేసి విత్తుకోవాలి.

విత్తేదూరం :
ఖరీఫ్‌ పంట : 60X15 సెం.మీ., వేసవి పంట : 45 X 15 సెం.మీ.
వేసవిలో మొక్కల సాంద్రత ఎక్కువగా ఉండేటట్లు చూడాలి.

ఎరువులు : ఎకరాకు 8 టన్నుల పశువుల ఎరువు వేసుకోవాలి. ఎకరాకు 12 కి|| నత్రజని, 25 కి||ల భాస్వరం, 25 కి|| పొటాష్‌నిచ్చే ఎరువులు వేసుకోవాలి. సగం నత్రజని, పూర్తి భాస్వరం, పొటాష్‌నిచ్చే ఎరువులను ఆఖరు దుక్కిలో వేసుకోవాలి. మిగిలిన సగభాగం నత్రజని విత్తిన 30-40 రోజులకు వేసుకోవాలి.

అంతరకృషి : కలుపు నివారణకు పెండిమిథాలిన్‌ మందును ఎకరాకు 1.25 లీ. లేదా అలాక్లోర్‌ 1.0 లీ. (తేలిక నేలలు), 1.25 లీ. (బరువు నేలలు) చొప్పున 200 లీటర్ల నీటిలో కలిపి నాటిన 48 గంటలలోపు పిచికారీ చేయాలి. తడినేలపై పిచికారీ చేయాలి. 30 రోజులకు ఒకసారి గొప్పు తవ్వి అంతరకృషి చేయాలి.

నీటి యాజమాన్యం : గింజలు విత్తగానే నీరు పారించాలి. 3వ రోజు మరల యివ్వాలి. ఆ తర్వాత ప్రతి 7-10 రోజులకు ఒకసారి నీటి తడులు యివ్వాలి.

సస్యరక్షణ: పేనుబంక : చిన్న, పెద్ద పురుగులు లేత చిగుళ్ళు, ఆకుల నుండి రసం పీల్చి నష్టం కల్గిస్తాయి. వీటి నివారణకు డైమిథోయేట్‌ లేదా మిథైల్‌ డెమటాన్‌ లేదా ఫాసలోన్‌ లేదా ఫిప్రోనిల్‌ల లోని ఏదేని ఒక మందును 2 మి.లీ. లీటరు నీటికి కలిపి మందును మారుస్తూ పిచికారీ చేయాలి.

బూడిద తెగులు :ఆకులపై తెల్లని పొడి పదార్ధం ఏర్పడి, తెగులు ఉధృతి ఎక్కువైతే పసుపు రంగుకు మారి రాలిపోతాయి. దీని నివారణకు నీటిలో కరిగే గంధకం 3గ్రా. లేదా డైనోకాప్‌ 1 మి.లీ. లీటరు నీటికి కలిపి పిచికారీ చేయాలి. తెగులు ఉధృతి ఎక్కువగా ఉంటే వారం రోజుల వ్యవధిలో మరోసారి పిచికారీ చేయాలి.

ఆకుమచ్చ తెగులు : ఆకుల మీద నల్లని మచ్చలు ఏర్పడి, తెగులు ఉధృతి ఎక్కువైనపుడు మచ్చలన్నీ కలసిపోయి, ఆకులు మాడిపోయి రాలిపోతాయి. దీని నివారణకు మాంకోజెబ్‌ 3గ్రా. లీటరు నీటికి కలిపి పిచికారీ చేయాలి.

ఎండుతెగులు : మొక్కలు నిలువుగా ఎండిపోతాయి. దీని నివారణకు ట్రైకోడెర్మ విరిడి 4గ్రా. కిలో విత్తనానికి పట్టించి విత్తుకోవాలి. కిలో ట్రైకోడెర్మ విరిడి 100 కిలోల వేపపిండిలో కలిపి ఆఖరి దుక్కిలో వేసుకోవాలి. తెగులు యితర మొక్కలకు వ్యాప్తి చెందకుండా 3గ్రా. కాపర్‌ ఆక్సీక్లోరైడు లీటరు నీటికి కలిపి మొక్క చుట్టూ, నేల తడిచేలా పోయాలి. పంట మార్పిడి పాటించాలి.

కోత : లేత కాయలను కోసి మార్కెట్‌కి పంపాలి. ముదిరిన కాయలలో పీచు శాతం ఎక్కువై కాయ నాణ్యత తగ్గుతుంది.

దిగుబడి : 20-25 క్వింటాళ్ళు /ఎరాకు

కోత అనంతరం ఉత్పత్తులు : 1% ఉప్పు ద్రావణంలో గోరుచిక్కుడు కాయ ముక్కలను ముంచి 10 ని||ల తర్వాత తీసి ఆరబెట్టాలి. ఎండిన వరుగులను గాలి తగలని డబ్బాలలో లేదా పాలిథిన్‌ సంచులలో నిలువ చేయాలి. 

ReplyForward